الأخطاء التي يقع بها مربي الدواجن وتسبب له خسائر كبيرة || 143

تربية الدواجن الناجحة تعتمد علي ثلاثة  أركان رئيسية وهي الكتكوت والعلف والمكان اللي هتربي فيه اللي هوالعنبر أو المزرعة نمسك أول حاجة مكان العنبر وكيفية اختياره  المفروض ان العنبر أو المزرعة لازم تكون بعيدة عن مناطق السكان المأهولة وتكون بعيدة عن مزارع الدواجن الأخري لتجنب انتقال الأمراض الي مزرعتك  ويكون بها مصدر جيد للمياه النقية ومصدر صرف للمخلفات بصفة دائمة حتي لا تسبب مشاكل للفراخ و بعض المربيين بيفرحوا بأسعار الكتاكيت الرخيصة ولكن ده خطأ كبير لان الكتكوت هو البذرة الي هتزرع فيها فاذا كان الكتكوت سيئ فان تربيته تكون بخسارة حتي لو أكلته سمن بلدي , لذلك يجب اختيار نوع الكتكوت من مصدر موثوق سواء عن طريق الشركة أو مندوب واذا كان الكتكوت زيادة في السعر شوية مش مشكلة ويمكن متابعة أسعار الكتاكيت (أهالي وشركات) في بورصة الدواجن.

كمان لازم تتطهر العنبر او المزرعة كويس جدا قبل تنزيل الكتاكيت وبعد انتهاء الدورة ولاتتسرع في تنزيل كتاكيت دورة جديدة قبل التطهير والفرشة او نشارة الخشب في ناس بتستسهل وتجيب أي نشارة وده غلط  لازم النشارة تكون كويسة مش ناعمة لان بيبقي فيها اتربة وخشب مطحون فبتسببمشاكل تنفسية للكتاكيت فبالتالي بتتعب الكتاكيت من أول الدورة و المفروض قبل وصول الكتاكيت العنبر تكون النشارة مفروشة  واطباق التحضين فيها العلف والسقايات فيها المياه والدواء اللي هتحضن بيه ولازم تكون الدفايات شغالة قبل وصول الكتاكيت بفترة عشان تدفي العنبر والأكل والمياه , عشان اما تنزل الكتاكيت تنتشر في العنبر بحيوية وتبدأ تاكل وتشرب بالصورة الطبيعية ويبدأ امتصاص كيس المح , لازم تعرف ان اول اسبوع او اسبوعين في الدورة مهمين جدا في تحقيق الوزن المطلوب في نهاية الدورة و لازم تظبط موضوع التهوية كويس مع الحرارة  وتوازنهم كويس لانهم أول حاجة بتسبب مشاكل تنفسية للكتاكيت وبتزود السردة عندك في العنبر فهتلاقي كتاكيت كبيرة وأخري ضعيفة متأخرة.

والتهوية الرديئة في العنبر بتسبب بلل الفرشة وبتعلي الرطوبة , وده بيسبب تنشيط بعض الميكروبات مثل الكوكسيديا , كما ان التهوية السيئة بتزود نسبة الأمونيا الناتجة عن فضلات الدجاج ودي مشكلة خطيرة لانها بتسبب تدمير وتأكل للخطوط الدفاعية للجهاز التنفسي للطائر وهي الاهداب الموجودة في الجهاز التنفسي والتي تصد كثير من الميكروبات والاتربة وتطردها خارج الجسم  وكمان بتسبب تهيج في الغشاء المخاطي للقناة التنفسية فتبدأ تظهر الامراض التنفسية في القطيع و لازم تكون الاضاءة في العنبر جيدة عشان ده بيحفز الجهاز العصبي عند الكتاكيت والفراخ وبينشطهم للاقبال علي العلف ومياه الشرب وكمان النافق اللي بيظهر عندك لازم تتخلص منه بعيد عن مكان التربية عشان العدوي والعلف أو العليقة بتاعتك لازم تكون عالية الجودة سواء كنت هتضربها علي ايدك تحت اشراف طبيب بيطري أو هتجيب علف شركات جاهز.

كمان تخزين العلف لازم يكون بطريقة سليمة عن طريق وضعه فوق حوامل خشب علي ارتفاع من الأرض ويكون مكان التخزين خالي من الرطوبة لتجنب عفونة العلف والمكان يكون متوفر فيه مصدر جيد للتهوية , وتبعد العلف عن المياه تماما , والقضاء علي وجود اي حشرات في المكان وايضا سوء تخزين العلف بيؤدي الي تكون الفطريات داخله والتي تفرز سموم فطرية وغيره وتسبب مشاكل للدجاج و موضوع الأدوية في ناس كتير بتلخبط الدنيا تبقي متابعة مع اكتر من دكتور بيطري في نفس الدورة وبيجيب أدوية من أكتر من مصدر , الأصح انك تتابع مع دكتور بيطري واحد يكون شاطر ويجي ينزل العنبر ويتابع حالة الكتاكيت بنفسه وده افضل لان ممكن هو يلاحظ  أخطاء انت تعديها و في ناس بتبقي شكاكة بتسمع لمربيين أخرين في موضوع التربية وبرامج الادوية وغيره وتلخبط نفسها وتضر المزرعة بتاعته , كل قطيع في عنبر ليه ظروفه غير اللي عند غيرك.

و الافراط في استخدام الأدوية أو استخدامها بشكل خاطئ دون اشراف الطبيب البيطري بيضر الفراخ بصورة كبيرة  و سقايات مياه الشرب لازم تتنضف بشكل دوري للناس اللي بتستخدم سقايات عادية مش اوتوماتيك و التحصينات لازم تكون مصدرها موثوق ومحفوظه بشكل سليم , وعند شرائها تجنب تعرضها للشمس او الحرارة , والمفروض تاخدها من عند الدكتور مع ثلج , ولو مش هتستخدم التحصين علي طول يبقي تحطه في التلاجه وليس الفريزر وعند فتح امبول التحصين يجب حل السدادة وانت حاطط ايدك تحت المياه عشان التحصين ميفسدش, وتكون معطش الفراخ قبل التحصين بفترة عشان يشربه التحصين قبل انتهاء مفعوله وغالبا مايكون ساعتين بعد حله في الماء , دي بعض النصائح بصورة عشوائية  للأخطاء  اللي بيقع فيها بعض المربين  وان شاء الله هنكمل في الموضوع القادم .

الجزء الثانى

نكمل كلامنا اللي بدأنا فيه الموضوع اللي فات ففي عملية التحصين مثل تحصين الانفلوانزا تحت جلد الرقبة  أو الحقن بأدوية اخري لأي سبب في عضلة الورك باستخدام الحقنة الأوتوماتيك فلازم تنضف وتطهر الحقنة كويس باستخدام ماء مغلي ومطهر كويس , وتتأكد ان الحقنة شغالة كويس عشان متعطلش منك وانت شغال بتحقن وتضيع وقت في تصليحها وده بيكون اجهاد علي الفراخ والمفروض ان يكون عندك حقنة اوتوماتيك خاصة بيك وبالمزرعة ومفيش شخص اخر بيستخدمها عشان متنقلش عدوي من عند غيرك لمزرعتك فبدل ماهتيجي تعالج الفراخ هتنقل ليهم مرض تاني ,اما تيجيتحقن الفراخ او تحصنهم تجنب اجهاد الفراخ ولازم العملية تتم بصورة سلسة  و مينفعش تضغط الفراخ كلها في اخر العنبر في مكان ضيق عشان تحقن ومينفعش الافراد اللي بتمسك الفراخ تفضل مسكاها لفترة كبيرة  وتقعد تجري ورا الفراخ عشان تمسكها لازم تنظم الموضوع عشان متتعبش الفراخ ممكن تطفي النور أو تقلل الاضاءة خالص عشان الفراخ تهدا وتعرف تمسكها بهدوء 
ويفضل انه اكتر من واحد يحقن عشان ينجزوا في الوقت وميتعبش الفراخ , و بعد ماتمسك الفراخ وتحقنها مترميهاش ع الارض جامد والأفضل انك تحط بطانية او حاجة طرية تانية وترمي الفراخ عليها براحة و اذا كنت هتجيب واحد يحقنلك الفراخ فلازم تتأكد انه مطهر الحقنة كويس ويكون لابس لبس نضيف خاص بالمزرعة بتاعتك عشان ميكونش جاي من مزرعة تانية وناقل معاه العدوي في الحذاء أو اللبس بتاعه أو الحقنة, ولازم يكون فاهم أهمية عملية التحصين او الحقن للفراخ وازاي تتم بطريقة سليمة دون اجهاد القطيع وكمان تجنب اجهاد الفراخ بعد عملية التحصين لان التحصين عبارة عن فيروس ( عدوي أو مرض) انت بتدخله جسم الفرخة, ووجسم الفرخم بيحارب الفيروس ده ويكون ضده اجسام مناعية ضد هذا المرض عشان لو حصلت اصابة مستقبلية  فبيبقي في حرب داخل الفرخة فتجنب اي ضغط عليهم  و الأصح انك تحط رافع مناعة طبيعي كويس قبل وبعد التحصين عشان ترفع مناعة الطائر وعملية التحصين تتم بصور سليمة وتعطي النتيجة المرجوة 
و لازم مربي الدواجن يكون عنده خبرة بالتربية كويس ويكون ملم ببعض الأمراض اللي بتصيب الدواجن وازاي يتغلب عليها بطريقة فعالة, ولازم يتابع الفراخ كويس واي اعراض مرضية تظهر علي الطيور يبلغ بيها الدكتور البيطري عشان يعالج المرض في اوله قبل مالمرض يتفشي في العنبر وتبقي المشكلة أكبر و بعض السيدات اللي بتربي الفراخ في البيت بتهمل الفراخ ولو عندهم مرض بتستني لحد مالفراخ كلها تتعب بصورة شديدة ويموت منهم عدد كبير وبعدين تروح تسال علي علاج ليهم وده غلط جدا و بعض الامراض مثل الكوكسيديا بتعمل اسهال شديد مدمم , والكولستيريديا بتعمل اسهال كريه الرائحة وده بيؤدي الي بلل الفرشة بصورة كبيرة وبتعمل رائحة سيئة في العنبر فبتعمل مشاكل أكبر , فلازم نعالج بسرعة اول ظهور الاعراض ولازم نكون عارفين بالأمراض والفيروسات المتوطنة في المنطقة أو الحيز اللي بربي فيه عشان احصن ضدهم وانا شغال في المزرعة, فمثلا اذا اصيب القطيع بفيروس نيوكاسل في الصورة المعوية فلازم في الدورة الجاية أحصن ضد نيوكاسل معوي 

وأفضل وقت لتحصين الفراخ او الكتاكيت هو بعد الفجر بشوية (عند بداية ظهور النور ) لان اقبال الفراخ على الماء في الفترة دي بيكون كبير وبكدة يستهلكوا مياه التحصين بسرعة قبل زوال المفعول و في فصل الصيف تجنب التحصين خلال النهار في فترة الحر الشديد وتجنب تعطيشهم خالص لان ده بييجي بنتيجة عكسية علي الفراخ وكمان في فصل الصيف والحر الشديد المفروض تشيل العلف من امام الفراخ من فترة الظهر الي اخر النهار لان تناولهم العلف في الحر بيبقى عامل ضفط شديد عليهم وبيعلي النافق , لان العلف بيزود حرارة الجسم الداخلية للفراخ نتيجة عملية الهضم والامتصاص والفرخ مبيقدرش يتخلص من الحرارة بشكل كويس خصوصا في فترة الحر و الأفضل انك تعلف الفراخ في فصل الصيف بدري الساعة 6 صباحا مثلا عشان يستهلكوا العلف قبل بداية ظهور الشمس والحر , وتعلف بعدين بعد المغرب مثلا ولازم تعرف ان كمية استهلاك الطيور لماء الشرب بتزيد خلال فصل الصيف فلازم تقدم كمية كبيرة من المياه باستمرار وتكون باردة شوية , والأفضل انك تحط خلا الحر في مياه الشرب مضاد للاجهاد الحراري مثل فيتامين سي أو أي فيتامينات أخري رافعة للمناعة 

و في حالة بلل الفرشة بتحط طبقة نشارة أخري أو بتشيل النشارة القديمة وتغيرها بنشارة جديدة خالص بشرط عدم اجهاد الفراخ فمثلا واحد يشيل النشارة ( السبلة) من تحت الفراخ وواحد أخر يخرجها بره العنبر وشخص أخر يحط النشارة الجديدة  ومتكبسش الفراخ علي بعض و ناس كتير بتهمل موضوع العوامل البيئية في تربية الدواجن مثل  الحرارة ونسبة الرطوبة و التهوية و جفاف الفرشة و راحة الطيور وبيقي فاكر ان العلاج بالأدوية بس هو اللي هيحسن الفراخ , بالعكس انت لو اهتميت بالحاجات دي هتحافظ علي الفراخ وتكون مناعتهم عالية وهتوفر ثمن ادوية كتير وتزود تكاليف الدورة عشان انت اهملت في النظافة وغيره وده هيسبب خسارة في اسعار الدواجن عند البيع وخصوصا في ظل الظروف السيئة الحالية في بورصة الدواجن و اذا كانت التهوية سيئة في العنبر ونسبة الأمونيا عالية فممكن تستخدم الشفاطات عشان تتخلص من المشكلة دي وتخرج الغازات دي برة وتستخدم وحدات تبريد ومراوح عشان توزع الهواء الجديد اللي داخل المزرعة بصورة متساوية في العنبر كله و اذا كانت الشفاطات في منتصف العنبر فان وحدات التبريد تكون علي جانبي العنبر واذا كان الشفاط في اول العنبر فالمفروض يكون وحدة التبريد في اخر العنبر.

المصدر: http://www.poultrystocks.com/2015/11/blog-post_26.html