سلالات دجاج التسمين ومميزات وعيوب كل نوع وأهم مصادرهم ومورديهم || 453

اتكلمنا كتير عن الدواجن وناقشنا مع بعض كثير من الامراض اللي بتصيب الدواجن وبتسبب مشاكل في بورصة الدواجن ونسينا نتكلم عن اهم حاجة اللي هي انواع الدواجن وسلالاتها المختلفة فخلونا انهاردة نعرف مع بعض اهم سلالات دجاج التسمين المنتشرة في مصر وهنوضح  مميزات كل سلالة عن الاخري وبعض النقاط الاساسية اللي بتخص كل سلالة.

طبعا الموضوع ده مهم ليه ؟ لان المربي لازم يبقي عارف نوع الكتكوت اللي مدخله المزرعة لان كل كتكوت وليه نظام تربية مختلف عن السلالة الاخري من حيث درجات الحرارة في ايام التحضين ونظام الاضاءة المتبع في الدورة  ومعدل الزيادة اليومية في الوزن  واستهلاك العلف  ومتوسط الاوزان بنهاية دورة التربية , وكمان لازم يعرف ان فيه سلالات كتاكيت بتتأخر عن غيرها في التحويل زي ماهنعرف دلوقتي , طبعا الاختلافات بين السلالات اللي بنقول عليها دي مش كبيرة لكنها بتفرق في كل حاجة وعشان نقدر نوفر للكتكوت كل مايلزمه فيدينا الوزن المطلوب في الاخر .

هنبدأ انهاردة في سلالات الدواجن المنتجة للحم وباذن الله هنتكلم برضو عن سلالات الدجاج البياض في موضوع اخر زي ماتعودنا عشان تبقي الصورة كاملة لدي كل من يهتم ببورصة الدواجن  ونرجو الافادة للجميع , في القرن التاسع عشر كان انتاج اللحم من الفراخ كناتج ثانوي لانتاج البيض واقتصر انتاج اللحم علي الديوك والفراخ التي قضت فترة الانتاج بتاعتها ولكن في منتصف القرن الماضي بعد تقدم العلم والتكنولوجيا وزيادة احتياج لحم الدجاج كمصدر بديل للبروتين قام علماء الوراثة بتهجين سلالات جديدة للدواجن تحتوي علي جينات تسرع عملية نمو الفراخ في اقل وقت ممكن واقل تكلفة .

ويعتبر اصل دجاج التسمين في كل العالم هما

1- سلالة الكورنيش الابيض (white cornish) التي تمثل خط الاباء وتتميز باتساع الصدر وقدرتها الفائقة علي انتاج اللحم ويكون لون ريشها ابيض وارجلها طويلة وخالية من الريش ولون اللحم والجلد أصفر ولون البيض بني غامق ولون شحمة الاذن احمر والعرف في شكل حبة الفاصوليا  وكانت تستخدم في مصارعة الديوك في الهند فسميت بالمصارع الهندي ويصل وزن الديك 4.767 كجم والانثي 3.632 كجم  .

2- سلالة البليموث روك الابيض (white Plymouth rock chicken) التي تمثل خط  الامهات وهي سلالة امريكية تتميز بالانتاج العالي للبيض ويوجد منها اللون الابيض والاسود والمخطط والاشقر ويكون لون البيض بني ولون اللحم والارجل والجلد اصفر والارجل غير مريشة وشحمة الاذن لونها احمر والعرف مفرد ويصل وزن الديك منها 4.313 كجم والانثي 3.405 كجم .

وانتجت الشركات العالمية من تهجين هذه السلالتين انوع كثيرة من كتاكيت اللحم منها الهبرد والاربو ايكرز والروص يشمل دجاج التسمين نوعين النوع الاول (سلالات التسمين البيضاء) يكون لون ريشه ابيض وكلنا عارفينه بالفراخ البيضة وبتتميز بسرعة معدلات النمو , والنوع الثاني هو سلالات التسمين الحمراء وتختلف عن الفراخ البيضاء في عدة أمور .

أولا

سلالات التسمين البيضاء  دورة تربيتها لاتزيد عن 50 يوم وتتراوح من 35 الي 50 يوم و تعطي اوزان اعلي من السلالات الحمراء و معظمها بيدي وزن 2 كجم عند عمر 35 يوم و اغلب التجار يفضلونها عن الفراخ الحمراء عند الشراء و يمكن عمل مايقرب من 6 دورات في السنة و دورة الربح تكون سريعة  اما عيوبها انها لا تتحمل درجات الحرارة العالية في فص الصيف وتسبب نفوق عدد كبير نتيجة للاحتباس الحراري وتكون اكثر حساسية للاصابة بالامراض التنفسية مثل البرد والمايكوبلازما والسي ار دي من السلالات الحمراء وتزيد المشاكل التنفسية بزيادة العمر لذلك يجب ظبط التهوية طول دورة التربية في العنبر و اسعار كتاكيتها عند الشراء تكون مرتفعة وتحتاج ظروف بيئية مثالية ولا تناسب المربي المبتدئ ومن انواعها  الهابرد , الروس , الكوب , الاربو ايكرز , اللوهمان  , ايفيان , اي ار , هيبرو .

ثانيا

سلالات التسمين الحمراء وهي  تتحمل درجات الحرارة العالية اكثر من السلالات البيضاء و حساسيتها للاصابة بالامراض التنفسية مثل المايكوبلازما اقل من السلالات البيضاء  و سعر الفراخ عند البيع اغلي من سعر الفراخ البيضاء و بعض التجار بيحب يشتريها و تناسب امكانيات المربي المبتدئ و الناس بتفضلها اكتر لان طعم لحمتها قريب من الفراخ البلدي و سعر الكتاكيت عند شرائها رخيص عن الكتاكيت البيضة , اما عيوبها ان دورة التسمين بتبقي شهرين او اكتر فيكون عدد دورات التربية في السنة 4 او 5 دورات فقط ومن انواعها  الشيفر الاحمر , ايزا براون , الساسو متعددة الالوان .

سلالات التسمين البيضاء :

-      الهابرد :

تتميز هذه السلالة بكبر حجم الكتكوت من اول يوم ويبدأ تكوينه الهيكلي وتكوين اللحم والريش من عمر اول يوم فيظهر علي الكتكوت التغير يوم عن يوم وهذه الميزة لاتتوفر في انواع الكتاكيت الاخري زي الايفيان والكوب اللي بتتاخر في النمو فلا يظهر تغير في حجم الكتاكيت الا بعد اسبوعين فيظن بعض المربيين ان الشركة غشته في الكتكوت , وعشان كده اتكلمنا عن الموضوع ده انهاردة , ويوجد من الهابرد 4 انواع مختلفة منها :   

 Hubbard Classic, Hubbard Flex, Hubbard Yield, Hubbard Color

2-     الروس : 

تتميز هذه السلالة من الكتكوت الابيض بتحملها لدرجات الحرارة العالية في فصل الصيف في العنابر ذات النظام المفتوح ويوجد عدة انواع للروس منها : روس 308 , روس 708 , روس ب م 3 .

3-     الايفيان :

يعرف الجميع ان درجات الحرارة في فترة التحضين للكتكوت عمر يوم تتراوح من 34 الي 35 درجة مئوية ولكن هذه السلالة لاتحتاج هذه الحرارة بل تفضل درجة حرارة معتدلة افضلها عند درجة حرارة 33 درجة مئوية  والرائج منها في مصر سلالة الايفيان 48 .

 4-      الكوب :

تمتاز هذه السلالة بانها بتعطي اوزان كويسة جدا اذا توفرت لها الظروف الملائمة مثل نظام الاضاءة الذي يصل الي 6 ساعات ظلام في نهاية الدورة ويوجد من هذه السلالة الكوب 500 , الكوب 700 .

5-      اربو ايكرز :

تعتبر من اقدم السلالات المنتجة للحم في مصر ومنها سلالة اربو ايكرز بلس .

سلالات التسمين الحمراء :

الفراخ الساسو :

تعتبر من اشهر سلالات التسمين الحمراء المنتشرة في مصر وتتم تربتها في مصر بشكلين مختلفين فبعض المربيين بيحضنوها لحد عمر اسبوعين او 20 يوم وبيبعها بالجوز للاهالي بغرض التربية  وبيكون مكسبه كويس لو عرف يسوق الكتاكيت كويس وهناك بعض المزارع او المربيين بيربو الفراخ الساسو لحد عمر شهرين او 55 يوم وبيبعوها لحم بالكيلو حيث يصل وزن الفرخة عند عمر شهرين 2 كيلو تقريبا ويوجد نوعين للكتاكيت الساسو هما ساسو جيل اول وينتج من تهجين ذكر جيل اول مع انثي جيل اول وتستهلك 4.5 كجم علف لتصل الي 2 كجم عند عمر 60 يوم , اما الساسو جيل تاني فينتج من تهجين ذكر جيل اول مع  انثي جيل ثاني وتستهلك 5 كجم من العلف لتعطي وزن 1 كجم عند عمر 70 يوم , ويتميز كتكوت الجيل الاول عن كتكوت الجيل الثاني بالأتي  فيكون اكثر مقاومة للامراض واكثر مناعة واعلي في معدل التحويل واكتساب الوزن ويكون سعر كتكوت الجيل الاول اغلي من الجيل الثاني  ونسبة الوفيات في الجيل الاول تكون قليلة عن الجيل الثاني .

 المصدر: http://www.poultrystocks.com/2016/02/broiler-breeds.html